زانکۆیا زاخۆ ب خۆشحالیڤە وەک بووتەکێ تایبەت پشکداری د کۆنفرانس و پێشانگەها Next Step 2026 دا کر، ئەوا ئێک ژ بۆیەرەکا گرنگە د بیاڤێ پەروەردە و خواندنا بلند دا،  هەروەسا ب شێوەیەکێ ڕاستەوخۆ دگەل ئارمانجێن گەشەپێدانا بەردەوام (SDGs) پەیوەندیدارە. کۆنفڕانس و پێشانگەهـ ل باژێرێ سلێمانی ل ڕێکەفتیێن 19 بۆ 21ێ ئەیلوولا 2026 هاتیە بڕێڤەبرن، لژێر درووشمێ «گەهشتن ب ئارمانجێ، گەشەکرن و گۆهۆرین — شیانـبەخشینا گەنجان».

شاندێ زانکۆیا زاخۆ یێ پشکداربووی پێکدهات ژ (پ.هـ.د. رمضان جعفر مصطفی) ، هاریکارێ سەرۆکێ زانکۆیێ بۆ کاروبێن قوتابیان و (پ.د. دیندار شمس‌الدین بری)، ڕێڤەبەرێ گشتی یێ سەنتەرێن ڤەکۆلینێن زانستی؛ و (م. دیمن زهیر جقسی) ڕێڤەبەرا سەنتەرێ ئارمانجێن گەشەپێدانا بەردەوام ل زانکۆیا زاخۆ.

د چارچوڤێ پشکداریێ دا، زانکۆیا زاخۆ بووتەکێ تایبەت دانا و پڕۆگرامێن ئەکادیمی، دەرفەتێن خواندنێ، چالاکییێن ڤەکۆلینان و خزمەتگوزارییێن قوتابیان بۆ قوتابیێن پاشەروژێ و سەردانکەران ژ هەمی پشکان ل هەرێما کوردستانا عێراقێ پێشکێش کرن.

د ڕۆژا ئێکێ دا، بووتا زانکۆیا زاخۆ پێشوازی ل قوتابیان، سەردانکەر و نوینەرێن دامەزراوەیێن جۆراوجۆر کر و پێزانین ل سەر پڕۆگرامێن ئەکادیمی، دەرفەتێن وەرگرتنێ، چالاکییێن قوتابیان و ژینگەها زانکۆیێ پێشکێش کرن.

هەروەسا، پانێلەکێ تایبەت د چارچوڤێ چالاکییێن کۆنفڕانسی  دا هاتیە بڕێڤەبرن، کو تێدا SDGs، زیرەکیا دەستکرد (AI) و ڕێکێن سەرکەفتنا قوتابیان د خواندنێ و پاشەروژێ دا هاتنە دانوستاندن کرن، ب تایبەتی ل سەر ڕولێ خواندن و تەکنۆلۆژیا د شیانـبەخشینا گەنجان و دروستکرنا پاشەڕۆژەکا بەردەوام دا.

ژ هەژی گۆتنێ یە؛ کو زێدەتر ژ 30 زانکۆ و دامەزراوەیێن پەروەردەیێ ژ هەرێما کوردستانێ د ڤێ وەشانێ دا پشکدار ببوون، و نێزیک 400 دەرفەت بۆ قوتابیان هاتیە پێشکێشکرن، دا کو دەرفەتێن پەروەردەیی و خواندنا وان بهێزتر ببن.

پشکدارییا زانکۆیا زاخۆ د Next Step 2026 دا نیشانا بەردەوامییا هەۆڵێن زانکۆیێ د پشکداریکرنا قوتابیان، پەیوەندییا ئەکادیمی، پێشخستنا ڤەکۆلینان و بهێزکرنا زانکۆیێ د ناڤ کۆمەڵگەها پەروەردەیا بلند یا هەرێما کوردستانێ دا ددەت.