ل دویڤ بڕریارا وەزارەتا خواندنا بلند و ڤەکۆلینێن زانستی بۆ زێدەکرنا دو بابەتێن نوی یێن گرێدایی "پەرەپێدانا کار و کارسازیێ" د پڕۆگرامێ خواندنێ دا ل سەرانسەری زانکۆیێن هەرێما کوردستانێ، زانکۆیا زاخۆ خۆلەکا ڕاهێنانێ یا تایبەت ب ڤێ مەبستێ ب دوماهیک ئینا و د ڕێورەسمەکى دا باوەرنامە ل سەر پشکداران دابەش کرن.
ئەڤ خۆلە بۆ دەمێ هەشت ڕۆژان بۆ (٢٠) مامۆستایێن زانکۆیا زاخۆ ژ لایێ هەردۆک مامۆستایێن خودان شیان (لاوند اکرام محمد) و (فرهاد سالم جمیل) ڤە هاتبوو پێشکێشکرن. د ڕێورەسمێ دوماهی هاتنا خۆلێ دا، ب ئامادەبوونا ڕێزداران (پ.هـ.د. جاسم محمد عبدو) هاریکارێ سەرۆکێ زانکۆیێ بۆ کاروبارێن زانستی و خواندنا بلند و (پ.هـ.د. رمضان جعفر مصطفی) هاریکارێ سەرۆکێ زانکۆیێ بۆ کاروبارێن قوتابیان، و ڕێڤەبەرێ پەیوەندیێن زانکۆیێ، باوەرنامەیێن پشکداربوونێ ل سەر بەشداربوویان هاتنە دابەشکرن.
د قۆناغا دەستپێکی دا، خواندنا ڤان هەردۆک بابەتان دێ ب تنێ ل کۆلیژێن زانست و ئەندازیاری هێتە پەیرەوکرن؛ بۆ ڤێ چەندێ ژی، ل هەر پشکەکا زانستی دو مامۆستا بۆ گۆتنا بابەتی هاتینە دەستنیشانکرن. پشتی هەڵسەنگاندن و سەرکەفتنا ڤێ قۆناغێ، دێ ئەڤ پرۆسەیە ل سەرانسەری پشک و کۆلیژێن دی یێن زانکۆیێ هێتە گشتگیرکرن.
تایبەتمەندییا ڤان بابەتان ئەوە کو میتۆدێ خواندنێ دێ ب تەمامی ب شێوەیێ پراکتیکی (کارپێکری) بیت و ژ شێوازێ تەقلیدی یێ تیۆری جودا بیت. د ئەنجام دا، هەر قوتابییەک دێ ل دوماهییا کۆرسێ پڕۆژەیێ خۆ یێ پراکتیکی پێشکێش کەت و ژ لایێ مامۆستایێ بابەتی ڤە هەڵسەنگاندنا زانستی بۆ هێتە کرن.
هەژی گۆتنێ یە، بڕێڤەچوون و پەیرەوکرنا ڤان هەردۆک بابەتان ل سەرانسەری زانکۆیێ، دێ ل ژێر چاڤدێری و سەرپەرشتییا ڕاستەوخۆ یا سەنتەرێ پەرەپێدانا کاری (CDC) ل زانکۆیا زاخۆ بیت.