ل رۆژا چارشەمبێ، ڕێکەفتی (١٤ی ١٠ی ٢٠٢٦)، رێزدار (پ.د. دیار عبدالکریم سعید)، سەرۆکێ زانکۆیا زاخۆ و لگەل دا هاریکارێن سەرۆکێ زانکۆیێ، کۆمبوونەکا بەرفرەهـ و گشتگیر دگەل هەمی سەرۆک پشکێن خواندنێ ل زانکۆیێ ئەنجامدا.
ئەڤ کۆمبوونە د چارچۆڤێ بزاڤێن بەردەوام یێن سەرۆکاتییا زانکۆیێ دهێت بۆ بلندکرنا ئاستێ زانستی و ئەکادیمی، چاڤدێریکرنا ڕژد و دروستا پرۆسا خواندنێ، و زانین و دابینکرنا پێدڤیاتیێن سەرەکی یێن پشکێن زانستی بۆ سالا نوی یا خواندنێ.
د دەستپێکا کۆمبوونێ دا، رێزدار سەرۆکێ زانکۆیێ پەیڤەک پێشکێش کر و تێدا تەکەزی لسەر گرنگیا بلەزیا هەماهەنگیێ د ناڤبەرا کارگێریا زانکۆیێ و پشکێن خواندنێ دا کر، ب مەرەما بجهئانینا پلانێن ستراتیژی یێن زانکۆیێ بۆ پێشکێشکرنا باشترین ئاستێ خزمەتگوزاریێن فێرکاری بۆ قوتابییێن خۆشتڤی.
هەروەسا، د تەوەرەکێ دی یێ کۆمبوونێ دا، گۆتووبێژێن بەرفرەهـ هاتنە ئەنجامدان لسەر ڤان خالێن سەرەکی:
• ڕێڤەچوونا پرۆسا خواندنێ: نرخاندنەکا هویر بۆ دەستپێکرن و رێڤەچوونا خواندنێ هاتە کرن بۆ پشتڕاستبوون ژ پابەندبوون ب دەمژمێرێن دەوامێ و پلانا خواندنا سالانە.
• باشترکرنا ئاستێ زانستی: دانوستاندن ل سەر ڕێکارێن نوی بۆ بلندکرنا شیانێن ئەکادیمی و پێشئێخستنا پلانێن وانەگۆتنێ ل گۆرەی پێدڤیاتیێن سەردەمی.
• پێدڤیاتیێن پشکان: گوهلێبوون و تۆمارکرنا پێدڤیاتیێن لوجیستی، تاقیگەهی، و کارگێری یێن هەمی پشکێن زانستی داكو د زووترین دەم دا چارەسەری بۆ بێنە دیتن و دابینکرن.
د دوماهیا کۆمبوونێ دا، سەرۆکێ زانکۆیێ دەمەک دا بۆ ئاراستەکرنا پێشنیار و سەرنجان ژلایێ سەرۆک پشکان ڤە، و ڕێنما و راسپاردەیێن پێدڤی ل دۆر زێدەتر چالاککرنا کارێن زانستی و ئارمانجێن ئەکادیمی پێشکێشی ئالیێن پەیوەندیدار کرن، بریاردان ل سەر بەردەوامیدان ب کۆمبوونێن وەسا ب شێوەیەکێ خولی بۆ پێشڤەبرنا پتر یا ناڤودەنگێ زانکۆیێ.